မလေးရှားတွင် အထောက်အထားမဲ့မြန်မာ ၁ ထောင်ကျော် ဖမ်းဆီးခံရ

မလေးရှားနိုင်ငံအတွင်းရှိ အထောက်အထားမဲ့ ဝင်ရောက် လုပ်ကိုင်နေသူများအား စစ်ဆင်ရေး တရပ်အဖြစ် ဒီဇင်ဘာလအတွင်းမှစ၍ ဖမ်းဆီးနေရာ အဖမ်းခံထားရသည့် မြန်မာနိုင်ငံသား ၁ ထောင် ကျော် ရှိလာပြီဖြစ်ကြောင်း မလေးရှားနိုင်ငံရှိ အလုပ်သမား ကူညီရေး အဖွဲ့များထံက သိရသည်။

မလေးရှား လူဝင်မှုကြီးကြပ်ရေးဌာနအပါအဝင် အဖွဲ့ပေါင်းစုံမှ ပြီးခဲ့သည့် ၂၀၂၃ ဒီဇင်ဘာလလယ်ခန့်မှ စတင်ကာ အော်ပရာဇီ စစ်ဆင်ရေးအနေဖြင့် ဝင်ရောက် ဖမ်းဆီးမှုများ လုပ်နေပြီး မလေးရှားနိုင်ငံသားများ၏ တိုင်ကြားမှုများ ကြောင့်လည်း မြန်မာအလုပ်သမားထောင်နှင့်ချီ အဖမ်းခံထားရကြောင်း သိရသည်။

နှလုံးလှ ပရဟိတသွေးလှူရှင်အဖွဲ့ ဥက္ကဋ္ဌ ကိုသက်က “ဒီဇင်ဘာမှာ အော်ပရာဇီက နေ့တိုင်း ၂ နေရာ ၃ နေရာကို ပုံမှန် ဝင်တယ်။ ရက်လွန်နေထိုင်သူတွေ အများဆုံး အဖမ်းခံရတယ်။ စာရင်းအတိအကျကိုတော့ မထုတ်ပြန်ဘူး။ တနေရာ ဖမ်းသွားရင် အယောက် ၁၀၀ ပါတယ်။ ဆယ်နဲ့ချီ ပါတယ်။ အားလုံးပေါင်းရင်တော့ ၁ ထောင်လောက် ရှိတယ်။ ကွာလာလမ်ပူမြို့မှာ အများဆုံး အဖမ်းခံရတယ်” ဟု ဧရာဝတီကို ပြောသည်။

အော်ပရာဇီမှာ မလေးရှားနိုင်ငံအတွင်းသို့ အထောက်အထားမဲ့ ဝင်ရောက်သူများ၊ နိုင်ငံခြားသားအများစု နေထိုင်သည့် နေရာများတွင် ဆူညံခြင်း၊ စည်းကမ်းမဲ့နေထိုင်ခြင်းများပြုလုပ်နေသူများကို သတင်းပေး တိုင်ကြားသည့်အတွက် ဖမ်း ဆီးခြင်း၊ ဗီဇာသက်တမ်းကုန်ဆုံးသူများအား စစ်ဆေးခြင်းနှင့် လုပ်ကိုင်ခွင့်မရှိသည့် အလုပ်များတွင် ဝင်ရောက် လုပ် ကိုင်သည့် နိုင်ငံခြားသားများအား ဖမ်းဆီးခြင်းတို့ ပြုလုပ်သည့် စစ်ဆင်ရေးတရပ် ဖြစ်သည်။

ဖမ်းဆီးခံရသည့် ကိန်းဂဏန်းအတိအကျအား တရားဝင် ထုတ်ပြန်ကြေညာခြင်းမရှိသည့်အတွက် မြန်မာအလုပ်သမား အရေး ကူညီပေးနေသည့်အဖွဲ့အစည်းများမှ ကောက်ယူထားကြသည့် ပျမ်းမျှကိန်းဂဏန်းကိုသာ သိရှိရပြီး မလေးရှား နိုင်ငံအတွင်းရှိ အထောက်အထားမဲ့မြန်မာများသာမက ဘင်္ဂလားဒေ့ရှ်၊ ပါကစ္စတန်၊ အိန္ဒိယ၊ ဖိလစ်ပိုင်၊ နီပေါ စသည့် နိုင်ငံသားများလည်း ဖမ်းဆီးခံခဲ့ရကြောင်း သိရသည်။

မလေးရှားတွင် ယခင်က နေရာတခုသို့ အော်ပရာစီ ဝင်ဖမ်းသည့်အခါတွင် ဖမ်းဆီးခံထားရသူများအား စုထားပြီးမှသာ အချုပ်ကားများ ရောက်ရှိလာခြင်းဖြစ်သော်လည်း ယခုအခါတွင် နေရာတခုသို့ ဖမ်းဆီးစစ်ဆေးမှုများ ပြုလုပ်ရန် စတင်ကတည်းကပင် အချုပ်ကား အများအပြား တပါတည်း ပါလာခြင်းဖြစ်ကြောင်း သိရသည်။

“မလေးရှားက လူဟောင်းတွေကတော့ သိပါတယ်။ လူသစ်တွေကတော့ မသိဘူး။ အော်ပရာဇီဆိုပြီး ဘယ်နေရာမှာ ဝင်ဖမ်းမယ်ဆိုတဲ့ သတင်း အတိအကျ မရှိပါဘူး။ ဖမ်းချင်တဲ့အချိန် ဝင်ဖမ်းတာ။ ဒီနှစ် အော်ပရာဇီက ကြမ်းတယ်” ဟု ကိုသက်က ပြောသည်။

လက်ရှိတွင် ဖမ်းဆီးခံရသည့် မြန်မာများကို မလေးရှား လူဝင်မှုကြီးကြပ်ရေးဌာန၏ ယာယီထိန်းသိမ်းရေးအချုပ်များ၌ ၃ လခန့် အချုပ် ကျခံရမည်ဖြစ်ပြီး ထိုမှတဆင့် ထိန်းသိမ်းစခန်းများသို့ ပို့ဆောင်ကာ မြန်မာသံရုံးမှ နိုင်ငံသားဖြစ် မဖြစ် အတည်ပြု၍ မြန်မာနိုင်ငံသို့ ပြန်လည်ပို့ဆောင်မည် ဖြစ်ကြောင်း သိရသည်။

ထိုကဲ့သို့ အဖမ်းအဆီးများနေသည့် အခြေအနေအတွင်း မလေးရှားရောက် မြန်မာနိုင်ငံသားများအနေဖြင့် သတိထား၍ ဆင်ခြင်နေထိုင်သင့်ကြောင်း ကူညီရေးအဖွဲ့များက သတိပေး ပြောဆိုထားကြသည်။

မလေးရှားရောက် မြန်မာနိုင်ငံသားတဦးက “ရဲတွေလာလို့ဆိုပြီး တိုက်ပေါ်ကနေ ခုန်ဆင်းတာမျိုးတွေ မလုပ်သင့်ဘူး။ ပုဆိုးတွေ ဝတ်တာ၊ သနပ်ခါးလိမ်းတာ၊ ကွမ်းတံထွေး ထွေးတာတွေ မလုပ်ကြပါနဲ့။ မလေးရှားနိုင်ငံသားတွေက အခု တိုင်ကြားတာတွေ အများကြီး တက်နေတယ်။ ကျနော်တို့ နိုင်ငံခြားသားတွေ ဆိုင်တွေ ဖွင့်တယ်။ ပွဲလမ်းသဘင်က အစကို တိုင်ကြားနေတာ။ အဲဒါကြောင့် အနေအထိုင်တွေကို ဆင်ခြင်ရလိမ့်မယ်။ နယ်မြေ အနေအထားကြည့်ပါ။ နောက်ပြီး တရားဝင်တဲ့သူတွေကလည်း တရားမဝင်တဲ့သူတွေကို ညှာတာပေးပါ” ဟု ပြောသည်။

မြန်မာနိုင်ငံတွင် ကိုဗစ်ကာလပြီးနောက် အလုပ်အကိုင်ရှားပါးမှုအပြင် ၂၀၂၁ ခုနှစ် အာဏာသိမ်းလိုက်သည့်အတွက် နိုင်ငံ၏ စီးပွားရေး ကျဆင်းလာခြင်း၊ နိုင်ငံခြား ရင်းနှီးမြှုပ်နှံမှုလုပ်ငန်းများပြန်လည် ထွက်ခွာခြင်းတို့ကြောင့် အလုပ် အကိုင်အခွင့်အလမ်းများ ရှားပါးလာသဖြင့် ပြည်တွင်းရှိ လူငယ်လူရွယ်များမှာ မလေးရှားနိုင်ငံအပါအဝင် ပြည်ပများသို့ ထွက်ခွာ လုပ်ကိုင်သူ များပြားလျက်ရှိသည်။

မလေးရှားနိုင်ငံသို့ တရားဝင်သွားရောက် လုပ်ကိုင်သည့် မြန်မာလုပ်သားဦးရေ ၅ သိန်းခန့်ရှိပြီး တရားမဝင် မြန်မာ လုပ်သား ၃ သိန်းခန့်ရှိကြောင်း မြန်မာအလုပ်သမား ကူညီရေးအဖွဲ့များထံမှ သိရသည်။