China Everbright Group ဥက္ကဋ္ဌဟောင်းအား ကွန်မြူနစ်ပါတီမှ ထုတ်ပယ်

တရုတ်နိုင်ငံက ထိပ်တန်းစီးပွားရေးခေါင်းဆောင်ဟောင်း နောက်တဦးကို တရုတ်ကွန်မြူနစ်ပါတီမှ ထုတ်ပယ်လိုက်ပြီ ဖြစ်ရာ တရုတ်နိုင်ငံ၏ ဘဏ္ဍာရေးကဏ္ဍ၌ ဖြိုခွင်းမှုများက နှစ်သစ်အထိ ဆက်လက်ဖြစ်ပွားနေသည်ကို ပြသနေခြင်းပဲ ဖြစ်သည်။

China Everbright Group ဥက္ကဋ္ဌဟောင်းနှင့် ပါတီအကြီးအကဲ Tang Shuangning ကို “စည်းကမ်းနှင့် ဥပဒေများ ပြင်းပြင်းထန်ထန် ချိုးဖောက်ခြင်း”ကြောင့် ထုတ်ပယ်လိုက်ကြောင်း နိုင်ငံ၏ စည်းကမ်းစစ်ဆေးရေး ဗဟိုကော်မရှင်( CCDI) နှင့် အမျိုးသား ကြီးကြပ်ရေးကော်မရှင်တို့က စနေနေ့ ထုတ်ပြန်ချက်တရပ်၌ ပူးတွဲကြေညာသည်။

Tang သည် “၎င်း၏ တာဝန်ဝတ္တရားများကို စွန့်ပယ်ပြီး” ဖြစ်တည်နေသော ဘဏ္ဍာရေး ဘေးအန္တရာယ်များကို အရေးယူ ဆောင်ရွက်ရန် ပျက်ကွက်ကာ လာဘ်လာဘ လိုက်စားသည်ကို စုံစမ်းစစ်ဆေးမှုအရ တွေ့ရှိရကြောင်း တရုတ်၏ အကျင့်ပျက်ခြစားမှု စောင့်ကြည့်ရေးအဖွဲ့အဖြစ် ဆောင်ရွက်သော CCDI ဆိုသည်။

၎င်းသည် ငွေကြေးနှင့် တန်ဖိုးကြီး လက်ရေးပန်းချီနှင့် ပန်းချီကားများကဲ့သို့ တံစိုးလက်ဆောင်များ လက်ခံကြောင်း၊ သူ့၏ ရာထူးနေရာကို အသုံးချကာ အလုပ်ရာထူးတိုးပေးသူများထံမှ “အကျိုးအမြတ်များ ဖော်ဆောင်ကြောင်း” ထုတ်ပြန်ချက်အရ သိရသည်။

Tang သည် ပစ္စည်းဥစ္စာ အမြောက်အမြားသော ပမာဏကို လက်ခံပြီး “ကိန်းကြီးခန်းကြီး နေထိုင်ခြင်း” လည်း ရှိသူဖြစ်ကြောင်း ထို ကော်မရှင်နှစ်ရပ်က ဆိုသည်။

သူသည် “မသင့်တော်သည် နိုင်ငံရေး အကြောင်းအချက်များ” ပါရှိနိုသည့် စာအုပ်များကိုလည်း တရုတ်နိုင်ငံတွင်းသို့ ယူဆောင်ကြောင်း အာဏာပိုင်များက ပြောသည်။ ထင်မြင်ချက်ပေးရန် တောင်းဆိုသည်ကို China Everbright Group က လက်ငင်းမတုံ့ပြန်ပေ။

Tang ၏ သံသယဖြစ်ဖွယ် ပြစ်မှုများအတွက် နောက်ထပ် သုံးသပ်ရန်နှင့် ဖြစ်နိုင်သော တရားစွဲဆိုမှုအတွက် အစိုးရ ရှေ့နေများထံ တင်သွင်းမည်ဖြစ်ကာ ၎င်း တရားမဝင် ရရှိထားသော ငွေကြေးနှင့် ပစ္စည်းဥစ္စာများကို သိမ်းယူခြင်း သို့မဟုတ် လွဲပြောင်းခြင်း ပြုမည်ဖြစ်ကြောင်း ထုတ်ပြန်ချက်အရ သိရသည်။

Tang သည် တရုတ်၏ သက်တမ်းအရင့်ဆုံးနှင့် အကြီးဆုံး နိုင်ငံပိုင် ဘဏ္ဍာရေးလုပ်ငန်းစုကြီးတရပ်ဖြစ်သော China Everbright ၌ ၂၀၀၇ မှ ၂၀၁၇ အထိ ဥက္ကဋ္ဌ နေရာအခန်းကဏ္ဍ ရယူကာ တရုတ်၏ ဩဇာအလွှမ်းဆုံး စီးပွားရေးခေါင်းဆောင်များအနက် တဦးလည်း ဖြစ်သည်။ ၎င်းသည် တရုတ်ဘဏ်လုပ်ငန်းစည်းကြပ်မှုကော်မရှင် CBRC ၏ ဒုတိယဥက္ကဋ္ဌအဖြစ်လည်း ယခင် တာဝန်ထမ်းဆောင်ခဲ့သည်။